NAVIGACIONI
Si të hartoj një prokurë të posaçme apo një autorizim?
- Detaje
- Publikuar më Shtune, 13 Qershor 2020 20:22
- Shkruan Arben Coli
Shpeshherë bashkatdhetarët nga Kosova apo Shqipëria më pyesin se si ta bëjnë një prokurë për autorizimin e një personi të tretë. Këto çështje mund të jenë p.sh. për ngasjen e veturës të një personi tjetër, për tërheqjen e dokumenteve personale, gjyqësore, të shtetësisë, apo për të rregulluar çështje pronësore në atdheun, etj.
unë si përkthyes I GJUHËS SHQIPE në Gjermani nuk merrem me hartimin e prokurave, por këtu kam shkruar informacionet se si ta bëni shumë thjesht.
Mënyra e parë
Shtetasit e Kosovës dhe të Shqipërisë
Gjëja më e rëndësishme që duhet të dini është se prokura NUK KA NEVOJË PËR PËRKTHIM.
Dhe pikërisht kjo është metoda që duhet të ndiqni:
- Hartoni prokurën në gjuhën shqipe ose lusni dikë që ta hartojë për juve.
MOS E NËNSHKRUANI ENDE PROKURËN. - Me prokurën e hartuar në gjuhën shqipe shkoni te cilido noter gjerman. Noter mund të gjeni me anë të kërkimit në internet, p.sh. “Notar in München“.
- Nga noteri ju tani kërkoni vërtetimin apo noterizimin e nënshkrimit tuaj dhe apostilen. Nënshkrimin duhet ta vendosni vetëm në praninë e noterit.
- Prokurën e noterizuar me apostile tani në origjinal duhet ta dërgoni në Shqipëri apo Kosovë.
- Pjesën e formular në gjuhën gjermane të noterit gjerman si dhe apostilen mund ta përktheni te një nga përkthyesit e licencuar në Kosovë e Shqipëri.
Pas këtyre hapave dokumenti është i gatshëm për përdorim.
Mënyra e dytë
Shtetasit e Shqipërisë kanë edhe një mënyrë tjetër për të bërë prokurën e posaçme.
Në qoftë se jeni shtetas shqiptar dhe jetoni në afërsi të konsullatës apo ambasadës shqiptare, atëherë mund ta bëni prokurën e posaçme pranë përfaqësisë së shtetit tuaj, pra në konsullatë apo ambasadë. Për të ditur procedurën ju lutem ndiqni informacionet në faqen zyrtare e-albania: https://e-albania.al/eAlbaniaServices/UseService.aspx?service_code=9783
Këtu mund të gjeni ambasadën ose konsullatën tuaj përgjegjëse:
https://www.arben-coli.de/al/ambasadat-dhe-konsullatat
Shpresoj që të arrini qëllimin tuaj duke ju uruar sukses.
Arben Coli
Info